東歐餐廳｜烏克蘭特色菜式

烏克蘭餐廳你又食過未？

東歐餐廳之前經杜汶澤介紹過後一直人氣高企🔥，book位full到要一個月時間。最近疫情嚴重都少左好多人，Lunch time去食唔洗等直入，午市套餐除左主食外隨餐仲會附送沙律、湯、餐飲包咖啡/茶/花蜜。

✨傳統羅宋湯 跟餐附送 (平時單點要$68)

午市套餐就可以同時試埋佢個傳統羅宋湯，同平時一般餐廳嘅羅宋湯好唔同，杜汶澤仲大讚。湯嘅顏色比較鮮紅，因為用左紅菜頭嚟熬製，加上豬肉同其他蔬菜。小編平時唔鍾意食紅菜頭浸味，但呢個湯可能經熬製就無紅菜頭個浸草青味，就算唔鍾意食紅菜頭嘅朋友應該都接受到。而湯仲會加上sour cream酸酸地幾開胃😋

✨南瓜忌廉湯 跟餐附送

幾Creamy，比較適合香港人口味嘅湯，有啖啖嘅南瓜味，味道夠！幾好飲👍🏻

✨招牌芝士焗牛脷 配飯 $138(套餐價)

牛脷切

成一粒粒一口牛咁嘅Size方便大家食，食牛脷好怕有浸羶味，呢個焗牛脷嘅羶就比較少，加左芝士一齊焗可蓋過牛脷嘅羶同比較惹味，而牛脷嘅肉質幾腍🤤，不過都幾漏下，整體味道唔錯。

✨香燒豬肋骨 配飯 $138(套餐價)

呢個飯就無咁特別，豬肋骨味道甜甜地，同普通餐廳嘅豬肋骨差唔多。小編就覺得豬肋骨肉質有啲鞋，佢另外有個醬汁俾你點嚟食，醬汁鹹鹹甜甜咁加左會好食啲。

PS：不過佢地啲飯會偏軟身，鍾意食粒粒分明飯嘅朋友就未必鍾意👀。

而環境幾有特色，餐廳擺設有佢哋民族嘅特色，餐廳嘅燈仲係馬賽克燈，打卡都幾靚📸。餐廳嘅員工同廚師都係來自烏克蘭同俄羅斯

想問外賣嘅話，佢地仲有做外賣真空即食包方便大家帶返屋企煮熱享用

味道：3.5 價錢：4 環境：4.5 服務：4 整體：4

東歐餐廳

地址：中環雲咸街63號巴力大廈1樓